Henkilötietokäsittely GDPR:in mukhaan

Asuntohallinto/Boverket oon henkilötietovastuulinen sille käsittelylle henkilötioista joka tehhään viraston toiminta-aluheitten raamin sisälä. Henkilötietoja käsitelhään taattasuojelumääräyksen mukhaan (GDPR). Täälä oon informasuunia kunka Asuntohallinto käsittellee henkilötietoja, mitä oikeuksia sulla oon rekistreerattuna ja kunka sie otat yhtheyttä viraston kansa.

EU:n taattasuojelumääräys (GDPR)

EU:n taattasuojelumääräys (GDPR) oon yhtheinen säänöstö koko EU:le  (General Data Protection Regulation). 

Taattasuojelumääräys oon sen takia ette vahvistaa suojaa privattihenkilöile ko henkilötietoja käsitelhään. Kaikki käsittelyt henkilötioista pitävät tyytyttää perustheelisia vaatimuksia joitako oon GDPR;issä. Vaatimukset tarkottavat muun muassa ette henkilötietoja saapii koota sisäle vain oikeutetuile tarkotuksille jokka ei ole liika ylheisiä ja tietomäärä pittää rajottaa siiheen mikä oon välttämätöntä tarkotukselle. Tietoja ei saa käsitellä jälemin sillä laila mikä oon ristiriitasta niishiin tarkotukshiin eikä niitä saa säästää pitemphään ko mitä oon tarpheelista. Se joka käsittellee henkilötietoja pittää pystyä näythään ette vaatimuuksia seurathaan.

Asuntohallinto oon henkilötietovastuulinen

Asuntohallinon organisasuuninumero: 202100-3989

Asuntohallinton e-postiosote: registraturen@boverket.se

Asuntohallinon postiosote: Boverket, Box 534, 371 23 Karlskrona

Asuntohallinon taattasuojeluasiamies

Asuntohallinolla oon taattasuojeluasiamies  

• joka ilmottaa suohraan jeneraalitorehtöörile
• jollako oon mantaatti ette ittenhäisesti tehhä töitä ilman ohjeita
• jollako oon hyvä tieto virastoitten prosessistä, informasuunisysteemistä ja taattasuojelun tarpheesta
• jollako oon monen vuen työelämäkokemus taattasuojelukysymyksistä virastoila
• jollako oon tietoa viraston atministratiivistä rytinistä ja menettelyistä
• joka informeeraa ja antaa neuvoja viraston johtokunnale ja työläisille kysymyksissä koskevan kunka virasto nouvattaa taattasuojelumääräystä
• joka valvoo kunka virasto nouvattaa päätöksiä – niinku taattasuojelumääräystä, muuta asianmukhaista lakisäätäntöä, inteerniä ohjaustokymenttiä – jokka koskevat henkilötioitten käsittelyä.

Taattasuojeluasiamies

Jos sulla oon kysymyksiä elikkä mielipitheitä kunka Asuntohallinto käsittellee sinun henkilötietoja sie olet tervetullu ottamhaan meän taattasuojeluasiamiehen kansa yhtheyttä e-postin kautta.

registraturen@boverket.se